شماره ۲۰ - یارون پرچ بوینین به انجیله داره

یارون پرچ بوینین به انجیله داره
یا سرخه گِلِ غنچوئه نو ویهاره ۱

یا غالیه گِلْ گِلْ دِشنّیه داره
یا مخمله که دوش دره مه خون‌کاره ۲

هرگه که سری خونّه، صدای یاره
مه سوته دل غم‌ره ورنه کناره ۳

مه دل حلقه ره مونّه فری کناره
تا دس نزنّی حلقه بزار نناره ۴

چن روزه که من دیدار ندیمه یاره
همینه که مه دیده‌ره خون بواره ۵

یکوار دیگر چیره بوینم یاره
دِ بال‌ره گردن بیورم شه خون‌کاره ۶

دل ترکنه مه، گِنْدِهْ پیون اناره
چش بِرْمِنِهْ مه، وارش پیون ویهاره ۷

زمستون مه چش، همیشه بواره
عجب چشمه که بی او، تن و سر داره! ۸